【第四場】
（碰杯的聲音。餐廳的爵士背景音樂仍然在播。）
（燈亮）
（已經有七分醉的女人倚偎著男人，男人與女人走到兩姊弟的二人桌。）
男人：（向著女子）最後一次。
女子：明白。
男人：錢，我唔介意俾。但我唔鐘意以前玩厭徂既玩具，成日係我面前出現。
女子：（沒有正面看著男人）係。
男人：好似隻蒼蠅恁，幽魂不散。
女人：（撒嬌）走得未啊？我好攰啦。
男人：（溫柔地）我地走架啦。
（男人把支票放到女子的面前）
男人：（向女子）（冷笑）here you go.
（女子仍然無望著男人）
男人：啊，你以前有禮貌尐。So not even a thank you?
（女子抬頭望著男人。緩緩站起身，走到男人身旁。）
女人：（輕吻了男人的臉）Thank you.
男人：唔。
（男人冷眼地看一看男子）
男人：（向男子）我唔知我係咪已經玩到殘晒，but have fun! （笑了一下）
（男人與女人帶著幾分酒意離開）
（女子回座，眼中似是有淚水）
（二人靜默）
男子：我唔會同佢講。
女子：（冷笑）你想個個人死快尐既，唔該。
男子：（探前望一望桌上的支票）五十萬，原來恁簡單。
女子：…
男子：最衰我唔係女人。我地做地盤既都係體力勞動，做你幾年都賺唔到恁多錢。
（男子喝一口紅酒，放下酒杯。嘆一口氣。）
（男子伸手取支票）
（女子立刻伸手壓著支票）
男子：唔使擔心，有錢就會還俾你。你唔介意可能耐尐就得架啦。
女子：（望著支票）唔係。
男子：其實尐錢都係用黎醫阿爸，我地一人一半都講得通啊。
（女子抬頭望著男子，拿走支票）
女子：你係咪以為我哩幾年，同人地食下飯，出下街就可以搵好多錢。覺得好容易。
男子：我無講咩喎。
女子：尐錢係我…係我，賺返黎。係我應得架。
男子：你叻，所以我幾時都話細佬要靠家姐。
（女子望著支票）
女子：（自言自語）其實點解我仲要幫你。
男子：講好左…
女子：咁耐無見，一黎就問人攞錢。你同依家返係醫院個個人一樣，都唔抵幫。
男子：好啦。
（二人互望）
男子：講徂恁耐。你借唔借俾我。
女子：（肯定地）唔借。
男子：點解？
女子：哩尐錢，唔係你應得既！
（男子站起身）
男子：就當我照顧徂阿爸阿媽恁多年，哩筆錢要你俾都唔係好離譜啊。
男子：尐錢俾你咪又係買手袋，去旅行。喂，我無路行架啦。
女子：依家睜人恁大條數。係你自己揀去賭錢，無人迫你，你大可以一開始就問我借！
男子：你會幫咩？
（女子盯著男子）
男子：我話尐錢要黎俾阿爸尐醫藥費，你一定會拒絕。
女子：（一靜）我依家望住你，剩係諗起個時阿爸點樣成日去賭錢，唔返屋企，無人知佢係邊。有人搵上門都唔係尐咩善男信女，唔知佢係出邊睹到幾大，又睜人地幾多錢…
男子：依家咪幾好，你搵到錢咪得囉。
女子：…你…
男子：無錢既話，唔好講老豆，老婆同個仔都唔會返黎。
（女子冷笑了一下）
（男子望一望女子）
女子：我真心希望你老婆跟徂一個有用過你既男人走徂！
男子：你！
女子：（低聲）因為你無用。
男子：咩話？
女子：無錢咪算囉…
男子：我話你聽…（走近兩步）
女子：仲要睹錢，做男人做到你恁無用！
男子：你講夠啦！
女子：So
fucking useless！
（男子想止住怒氣）
女子：我本來無諗著講，不過我一早就知你老婆跟人走徂。
男子：！
女子：事實係佢一早就頂你唔順！佢做得無錯架。離開你先會行返條啱既路。
男子：我唔信。
女子：你自己講，你輸錢，返到屋企會唔會打人？
男子：…
女子：會唔會啊？
男子：…
女子：一模一樣。所以我唔理個個人係咪瞓係醫院就死，我希望佢死快尐，但阿媽有安樂日子過。而你既下場同個個人都會一模一樣！
男子：唔好攞我同佢比。
女子：It’s
the fucking same! 都係恁無用！
（男子在電光火石間狠狠地摑了女子一大巴。女子站不穩，整個人跌在地上。混亂間，酒杯掉到地上，碎開了。餐巾被拋到一角。男子著魔似的揮拳。女子不知道是暈倒還是死去，但已伏在地上動也不動。）
（男子在女子手上取走支票，整理一下頭髮，弄好那套不稱身的西裝。轉身走了一步，回頭。望著伏地上的女子。）
男子：係啊，我地都係一樣。（握緊手上的支票）
（無聲地只做口型）Have fun.
（無聲地只做口型）Have fun.
（燈暗）
【全劇完】
