【第三場】
（燈亮，燈光集中在兩姊弟的桌子上）
（女子一個人坐著飲酒。桌子上放著一件被吃掉一口的蛋糕。）
（傳來男人與女人的笑聲。女子望過去，看見坐在不遠處的一對男女在用餐。呆了一呆，然後把頭髮撥到一邊，想遮掩自己一邊臉。）
（未幾，男子似是洗了臉，緩緩走到自己的座位，坐下。）
男子：對唔住，我想冷靜尐先同你慢慢講。
女子：恁冷靜徂未？
男子：好似好尐…
女子：…
男子：我唔知點講你先唔會誤會…
（女子望著男子一會兒）
女子：我唔會迫你。
男子：其實我都唔想麻煩你…不如我之後再搵你。
女子：…
男子：你今晚食得開心架嘛。
女子：我依家打俾你老婆問下咪知囉。
男子：下。（一頓）唔使啦…
女子：反正我都想聽下我姪仔把聲。（女子從手袋中取出手機）
男子：恁夜，佢地瞓徂架啦。
女子：都唔係好夜啫。
男子：喂…
（女子開始按電話。男子樣子焦急。）
男子：你會嘈醒佢地架…
女子：（把手機放到耳邊）I don’t care.
男子：俾個電話我。
女子：哈。
（男子一手搶了女子的手機，望一望手機螢幕。）
男子：（揚聲）你唔係打緊…
（女子慫一慫膊頭）
男子：你…
女子：係你唔講點解約我食飯先。
男子：你呃我…
女子：你迫我恁做。
男子：做咩要呃我。（用凶狠的眼神望著女子）
女子：hey！
男子：你係咪覺得恁樣好好玩…
女子：喂，I was just kidding …
男子：睇住我衰，無運行，就連你都係恁對我。
女子：okay, I am sorry. Okay? （但樣子不似有悔意）
男子：我依家終於都明，點解你哩幾年生活都恁好。
女子：咩意思…
男子：…因為…（細細聲）你真係好黑人憎。
女子：Excuse me？
男子：值得屌完再屌。
女子：what!!??
男子：幾多錢都唔介意俾。唔怪得你恁有錢，我依家一尐都唔覺得出奇啦！
（女子立時站起身，走向男子狠狠地摑了他一巴）
男子：… …
（女子急急回到座位，然後整理一下自己）
男子：……
女子：我地走啦。（示意侍應結帳）
男子：…你都唔介意係高級餐廳恁。恁我都無理由唔講啦。
女子：遲尐先啦。（拿起手袋）叫徂佢埋單，我係出邊等你。（站起）
男子：五十萬。
女子：（回一回神）咩話。
男子：你聽到架。我想問你借五十萬。
女子：要五十萬黎做咩？
男子：醫阿爸個病。
女子：你當我傻架？醫病要恁多錢？
男子：醫病唔使恁多…
女子：係囉！
男子：一開始就無諗過要問你攞錢。阿爸醫病開頭個幾萬蚊俾完，我已經無錢剩。家用都無錢俾，前排做地盤尐散工仲咩無工開，老婆怨徂好耐…
…我已經成個月無見過佢。
女子：（冷笑）連老婆都走埋。
男子：帶埋個仔。
女子：…
男子：醫院打黎話住院費，藥費前前後後又要俾多幾萬蚊，我仲邊有錢。所以…所以我就去徂澳門諗住搏一鋪。五十萬，係加埋尐利息。
女子：… …（低聲）死性不改。
男子：今次係因為阿爸，我其實已經無賭好耐。
女子：… …unbelievable… …
（二人陷入一片沉默）
女子：（想了一想）好，你話你無得揀。我今日俾個機會你，等你「重頭來過」。
（男子肯定地點頭）
（女子看著男子。站起身，吸了一口氣。走向不遠處的一對男女。）
（燈光一轉，集中在男人與女人的二人桌。）
女子：（向男人）Hello.
男人：（抬頭望女子）Oh, so you are here.
女子：（笑）我幾驚你唔認得我。
男人：（望著對面的女人，面上露出不解的表情）都唔係好認得架啦。
女子：阻住你食飯，唔好意思。But I need your help.
Please.
男人：（冷笑）oh. I see.
（燈滅）
沒有留言:
張貼留言